Ti Nabbiag A Pammati: Daytoy Ti Patpatien Dagiti Nazareno

Translation:Viollydia C. Lartec

June 2003

TI NABBIAG A PAMMATI

Daytoy Ti Patpatien Dagiti Nazareno

Ti tunggal bunggoy nga nagtalinaed ti nabayag a panawen ket naipondasyon iti nabileg nga panggep, pammati, ken panangsalimetmet. Kasta iti Church of the Nazarene, nabuangay tapno mabalbaliwan ti lubong babaen ti panangisaknap na iti kinasanto nga nailanad iti Biblia. Gapuna maysa tayo nga Iglesia a nakaitalkan ti panakaiwaragawag ti mensahe ti panagsanto. Ti misyon tayo ket maaddaan iti adalan nga umasping ken Kristo iti amin a nasion.

Ti panagtalinaed ti Church of the Nazarene ket naibatay iti pannakipasetna iti misyon ti Dios. Saan laeng nga isu ti pakakitaan ti naiduma nga Iglesia ti Dios, no di ket ti naiduma a wagas ti panangisaknap iti pagarian ti Dios iti isuamin a paset ti lubong.

Idi immuna a taw-tawen daytoy a milenyo, rumbeng laeng nga ilasin ti Church of the Nazarene dagiti naidumduma a kinalaing ken misyon nga annuroten ditoy lubong ken ti tunggal kaputotan.

Ikararag tayo a dagitoy nga papatien nga intayo ipatpateg ken salsalimetmetan ket agserbi a kas mangidalan, inspirasyon, ken pagtuladan ti tunggal Kristiano ken uray pay dagiti dadduma nga ig-iglesia saan laeng nga itatta ngem kadagiti sumarsaruno pay nga decada.

Ti Kangrunaan A Papatien Ti Iglesia

(Core Values)

1. Adda Kinakristiano kadatayo

A kas kamkameng ti Iglesia ti intero nga lubong, makimaymaysa tayo kadagiti namati a mangiwaragawag a ni Jesu-Cristo ket Apo ken isuro kadagiti tattao ti nakristianoan a sursuro a kas koma ti maymaysa a Dios-tallo ti kasasaadna, maipamatmat a kas ama, anak ken Espiritu Santo. Napateg kadatayo ti pammati ti kinasanto nga maitutop iti sursuro ni John Wesley ket patien tayo nga daytoy ti pamay-an tapno matarosantayo a naimbag ti pudno nga pammati a maiyannatop iti Biblia, pannaka - awat, tradisyon, ken kapadasan.

2. Adda Kinasanto kadatayo

Gapu ta ti Dios Santo, ayabannatayo met nga agbiag iti kinasanto. Mamati tayo nga ti Espiritu Santo tarigagayanna nga mapadasan tayo ti maikaddua a trabaho ti parabur ti Dios, nga aw-awagan iti naduma-duma a termino kas koma iti “naan-anay a pannakagugor” ken “panakabautisar iti Espiritu Santo”, “pannakalinis manipud ti isuamin nga basol;” Pannakapabaro tayo a kaas - asping ti Dios; ken mangmangted kadatayo ti pannakabalin nga mangayat ken ni Apo Dios iti amin a puso, kararua, panunot, ken pigsa, ken ti pada tayo a tao a kas ti bagi tayo; ken manipud kadagiti biag tayo, maiparangarang ni Kristo.

3. Adda Mision tayo

Datayo dagiti naibaon nga agtul - tulnog iti ayab ni Kristo ken napabileg babaen ti Espiritu Santo. Naawat tayo ti ayab ni Jesu-Cristo nga mangiwaragawag ti mensahe ti pannakaisalakan, pannakapagsanto iti intero a lubong. “Ngarud, iti pannakipagtrabahomi iti Dios, ipakpakaasimi daytoy kadakayo: Naawatyon ti parabur ti Dios ket diyo ipalubos nga awan kapaypay-anna” (2 Corinto 6:1). Impaay ni Jesu-Cristo kadatayo ti Espiritu Santo tapno maadaan ti kabaelan a maiyaramid ti panggep ti awagna. Ti misyon tayo ket (a) agrugi iti panagdaydayaw, (b) agserserbi iti sangalubongan babaen ti panangisuro ken panagtulnog ti kapada a tao, (c) pabilegen dagiti namati tapno rumang-ay babaen ti panangsursuro, (d) ket isagana dagiti lallaki ken babbai iti panagserbi babaen iti mas nangat-ngato nga tukad ti edukasyon.

Adda Kinakristiano kadatayo

(We are a Christian People)

Makimaymaysa tayo kadagiti amin a namati iti panangiwaragawag ti kina Dios ni Jesu-Cristo ket isuna laeng ti idaydayaw ken itantan-ok tayo. Mamatitayo nga ti Dios babaen iti ayatna, pakawanen na dagiti basbasol tapno iti kasta maisubli ti relasyon tayo Kenkuana. Ket mabalin tayo met nga ayaten ti pada tayo a tao a kas panangayat ti Dios kadatayo ken agpipinakawan a kas pamakawan ti Dios tapno iti kasta maiparangarang ti kababalin ni Kristo manipud kadatayo. Makikadua tayo kadagiti dadduma pay a namati nga mangisursuro met iti “Trinity.” Ipateg tayo launay ti doktrina ti kinasanto nga patpatien ni John Wesley. Ti Nasantuan a Surat isu ti kangrunaan a pagbatayan dagiti naespirituan a kinapudno ken adda nga mapabileg koma babaen ti panangawat, tradisyon, ken kapadasan.

Iti panakipagmaymaysa tayo kadagiti tattao ni Apo Dios, bigbigentayo ken dayawentayo ni Jesu – Kristo nga Apo tayo.

Ni Jesu-Cristo ti Apo ti Iglesia. A kas nailanad idiay “Apostles’ Creed.” daytoy nga Iglesia ket nasantuan, pangsapasap, ken maiyannatup kadagiti pammati dagiti apostoles ni Cristo. Babaen ken Cristo-Jesus ken ti Espiritu Santo, ti Dios Ama ket mangipapaay ti pammakawan ken pannakikappia iti entero a lubong. Gapu ta pinakawanna tayo ti Dios, rumbeng met nga agpipinnakawan ken agkikinnapia tayo amin. Gapu iti daytoy a pamay-an, datayo ket maibilang nga iglesia ni Cristo-Jesus nga Apotayo ken parte iti Bagina. A kas bagi ni Cristo, addaan tayo ti “maysa nga Apo, maysa a pammati, maysa a bautismo” (Efeso 4:5, 6). Panpaneknekan tayo ti panakimaymaysa tayo iti Iglesia ni Cristo Jesus nga Apotayo ken ikagumaan tayo nga agtalinaed ditoy.

Ni Cristo Jesus ket Santo ken Apo. Ngarud saan laeng nga adda panagmaymaysa ti Iglesia no diket adda pay kinasanto. Dagiti Kristiano ket rumbeng laeng nga agsanto gapu ta ti Iglesia ket intuding ti Dios nga agbalin a nasantuan babaen ken ni Cristo Jesus. Nasantuan gapu ta isu ti pannakabagi ni Cristo, ket kasapulan nga agbiag iti kababalin ni Jesus – Nga isu ket nagpakumbaba ken nagserbi kadatayo a kas maysa nga adipen. Paneknekan tayo nga ti panakipaset tayo iti Iglesia ket sagot ken awag ti Dios.

Ni Cristo Jesus ti nasantuan nga Apo ti Iglesia. Gapu iti daytoy, saan nga agmaymaysa nga nasantuan ti Iglesia no di ket iti sapasap nga immawat iti nakristianoan nga pammati. Pasingkedan tayo ti pammati dagiti Apostol (Apostolic Faith) nga papatien met ti amin nga Kristiano ti sangalubongan iti amin a panawen. Awaten tayo ti kapanunutan ni John Wesley nga amin a Kristiano ket agkakabsat ket adda ti nadekket a langen-langen gapu ken Cristo Jesus. Addaan tayo met iti napapateg nga adal manipud iti Nasantuan a Surat. Amin a banag nga saan a napateg iti pamay-an ti panakaisalakan ket maibaga tayo nga waya-waya iti tunggal Iglesia.

Ni Cristo-Jesus ti Apo ti Nasantuan a Surat. Gapu iti daytoy, saan laeng nga ti Iglesia ket agmaymaysa, nasantuan, ken sapasap no di ket addaan iti kababalin dagiti apostol. Nabangon manipud kadagiti apostoles ken propeta ken agtultuloy a mamati kadagiti sursuro dagiti apostoles. Kangrunaana, ti Iglesia ibilangna ti Nasantuan a Surat nga isu laeng ti pagbatayan ti pammati ken panagbiag. Ti panagbalin nga Apo ni Cristo-Jesus iti Biblia ket tapno tarusan tayo babaen iti panangidalan ti Espiritu Santo a kas pamaneknek tayo ken Jesus. Tapno umno ken nalinteg ti pannakatarus tayo iti Biblia, bigbigbigen tayo dagiti pammati idi un–unana ken dagiti naibagbaga dagiti imun – una a nagbalin a napudno nga Kristiano a nangilawlawag iti Biblia. Palubusontayo a ti panangtarus tayo ti Biblia ket babaen iti panangidalan ti Espiritu Santo nga isu ti mangiturong kadatayo tapno agbabawi, mamati ken mangisigurado iti pannakaisalakan tayo. Kamaudiananna, ti panangsubok tayo ti bukod tayo a pannakatarus iti Biblia ket babaen ti panangsukimat iti gapuanan na ket pannaka – ilawlawag dagiti pamaneknek ni Jesu Kristo.

Kangrunaan na, naayaban tayo tapno agsaksi iti kinasanto ti Iglesia ni Cristo-Jesus a nakasakupan ti kadawyan a sursuro ti panagsanto ti Wesleyan. Paspasingkedan tayo nga dagiti prinsipyo ti pannakaisalakan babaen ti parabur ti Dios ket babaen met iti pammati ken Cristo-Jesus nga isu ti Mannubbot tayo. Gapu iti dayta a pammati, itultuloy tayo nga pagtakderan nga ti Iglesia ni Cristo-Jesus nga Apo tayo ket maymaysa, nasantuan, sapasap, ken naibatay kadagiti Apostol. Ngem ti kangrunaan nga ayab tayo ket isu iti panangsalimetmet iti kinabagas ti kinasanto a kas buy – buyaen ti sangalubongan ken ti Iglesia a mangpapigsa kadagiti tattao ti Dios tapno agbiagda a naan-anay iti nasantuan nga ayat ti Ama. Gapu iti daytoy, pasingkedan tayo ti panangtarus iti sursuro ti Wesleyan Holiness maipanggep iti nakristianoan a pammati ket ikagumaan tayo a napudno tayo koma iti kangrunaan a sursuro kas koma iti parabur a mangisalakan ken wagas ti panag - babawi, panag-pammati, pannakaiyanak a nabalbaliwan, pannakapakawan, talged iti pannakaisalakan, ti grupo ken urnos dagiti Kristiano, ken kasta met ti naan-anay nga ayat.

Adda Kinasanto kadatayo

(We are a Holiness People)

Naayaban tayo nga agsanto babaen ti Biblia ken naiyasidegtayo iti Dios babaen ti parabur na tapno agrukbab kenkuana iti amin a puso, kararua, panunot, ken pigsa, ken ayaten tayo met ti kaarruba a kas ti bukod tayo a bagi. Manipud iti daytoy, isuko ken paiturayan tayo iti Apo a kas patien tayo launay nga ti Dios ket an - anayenna ti panagsanto tayo a kas maikaddua a kapadasan ti Kristiano. Mamati tayo nga ti Espiritu Santo ket pasingkedannatayo iti basol, linisan ken punnuoenna ti biag tayo, pabilegennatayo, ken balbaliwannatayo nga inaldaw – aldaw babaen ti parabur na tapno agbiag tayo nga addaan iti ayat, naespirituan a sursuro, nainsiriban ken manangaasi nga aramid, nalinteg ken nadalus a kabibiag. Inton mapasamak dagitoy, agbalintayo a kaas – asping ti Dios ken mapataud kadatayo ti kababalin ni Kristo babaen ti panagtrabaho ti Espiritu Santo. Ditoy nga maipakita ti kinasanto ti biag ti namati a kaas – asping ni Kristo.

Mamati tayo iti Dios Ama, ti namarsua ken nangted iti biag dagiti isu amin nga saan nga agbibiag. Maysa tayo idi nga awanan met ti biag aginggana nga ti Dios pinarsuana tayo a kalanglangana ket intalekna kadatayo ti kinasiasino na. “Siak ti Apo a Diosyo ket masapul a pagtalinaedenyo dagiti bagiyo a nasantuan gapu ta santoak” (Levetico11:44).

Ti gagar tayo nga agbalin a Kristiano nga addaan kinasanto ket naggapu iti kinasanto ti Dios. Ti kinasanto ti Dios ket ipakita na ti kina – Dios na nga awan makaartap kenkuana iti kinatan – ok ken kinadayag. Isunga rumbeng laeng nga ti sungbat dagiti tattao iti kinadayagna ket dayaw iti Dios iti kinasiasinona. Ti kinasantona ket maiparangarang iti panangtedna ti panakaisalakan babaen ken Cristo Jesus a maigapu ti asi. Mabalin tayo laeng nga dayawen ti Dios no maam-ammo tayo isuna ken agtalinaed tayo iti nadekket nga relasyon kenkuana. Ket ti panakaam – ammo tayo a naim – imbag kenkuana mapasamak babaen ken Cristo-Jesus, ti kakaisuna nga Anak ti Dios. Adda panagdayaw tayo iti nasantoan ken manangisalakan a Dios no adda met panagayat tayo iti kapada tayo a tattao.

Adu dagiti wagas ti panagdayaw iti natan-ok ken manangaasi a Dios. Umuna kadagitoy ket isu ti panagdaydayaw ken panagkarkararag nga kaddua dagiti kapada a namati. Mabalin tayo met ti agdayaw babaen iti bukod a panangad-adal ti Sao ti Dios ket pagtulnogan iti mensahe na. Ti panangibingay ti Sao ti Apo, panang - asi iti kapada a tao, kinalinteg, nalinis ken naulimek a panagbiag ket wagas met laeng ti panagdayaw tayo iti Dios. Uray dagiti gagangay laeng nga aramiden tayo iti biag no dakkel ti kaipapanan na iti panagdayaw iti nasantoan a Dios, agbalinda nga isu ti kabibiag tayo.

Inpakaammo ni Cristo-Jesus kadatayo ti Nasantuan a Dios, ken insaadna ti modelo no kasano nga agbiag a nasantoan. Impakaawat ni Jesus kadatyo ti kinasanto babaen iti biag na, panagsacripisyo, ken dagiti insursuro na nga masarakan idiay Ebangelio nangruna kadagiti kaskasaba na idiay bantay. Kas mamati tayo nga adda kinasanto kadatayo, ikagumaan tayo ti agbiag a kas ken Jesus iti isu amin a panangkanunong ken aramid. Ikkan ni Apo Dios dagiti namati nga agdayaw kenkuana a sipupuso ti pannakabalin nga agbiag a kas ken Kristo babaen iti parabur na. Ket no mapasamak daytoy, maawatan tayo nga naimbag ti pudno a kaipapanan ti kinasanto.

Inikkannatayo met ti Dios iti waya-waya a mangpili a kas sagot na. Gapu ta gagangay laeng iti tao nga agbasol, iruknoy na ti waya-wayana nga agdisisyon para iti bagina saan ket a ti pagayatan ti Dios (Isaiah 53:6). Dinadael tayo ti pinarsua ti Dios gapu ti basol ket naituding tayon a natay gapu iti basol (Efeso 2:1). No kayat tayo met nga mapabaro ti naespirituan a biag tayo, ni Apo Dios ket manangaasi ket kabaelan na nga aramiden daytoy babaen ti panangisalakanna babaen iti bugbugtong nga Anakna.

Mamati tayo nga naidumduma ti yaay ti Dios iti lubong babaen ken Jesus a kakaisuna nga Anakna a ni Cristo-Jesus iti panagbalin na a Dios-Tao. Ni Jesus immay ditoy lubong tapno pabaroen na ti ladawan ti Dios iti biag tayo iti kasta maadaan tayo ti panakabalin nga agbiag a nasantoan. Mamati tayo nga ti panagsanto ti biag ti namati ket bunga ti nagrigatan a kapadasan iti naespirituan ken awan ingana nga panagrang – ay. Kalpasan ti panakapabaro ti biag, ti Espiritu Santo iyas – asidegnatayo pay ken ni Cristo-Jesus tapno maan-anay ti panangisuko tayo iti biag tayo Kenkuana. Ket ti Dios ugasan na ti tawid a basol kadatayo babaen iti aw –awagan tayo a pannakagugor wenno pannakabautisar ti Espiritu-Santo iti kasta agtaeng ti presensia ti Dios iti biag tayo. An-anayenna ti panagayat tayo, ikkanna tayo ti pannakabalin nga agbiag a nalinteg ken bileg nga agserbi.

Agtrabtrabaho kadatayo ti Espiritu ni Jesus tapno manipud kadatayo mapataud ti nasantuan nga ayat a kababalin ti Dios. Ikkannatayo ti kabaelan nga “mangikawes ti baro a parsua nga umasping iti Dios, iti pudno a kinalinteg ken kinasanto ti biag” (Efeso 4:24). Ti panagbalin nga kaas-asping ti Dios ket no makita ti kababalin ni Cristo-Jesus iti biag ti tao. Iti kaadda ti nadiosan nga aramid kadatayo babaen iti pannakagugor, bigbigentayo nga adda pay laeng ti pagkurangan tayo nga naespirituan gapu ta ti galad tayo ket agbiag nga umisu ken ni Kristo iti tungal sawen tayo, panunot, ken aramid. Ket iti panagtultuloy tayo nga agpasakop kenkuana, agtulnog, ken agpammati kenkuana, mamati tayo nga rumangrang-ay ken mapatpatibker tayo manipud iti agrugrugi a baro a biag para iti maysa a biag a napnuan iti dayag ti Dios (2 Corinto 3:18). Magun-odan tayo daytoy a klase a biag ti Kristiyano babaen ti panangipakat tayo kadagiti sursuro a naespirituan, pakilangenlangen ken panakipaset kadagiti ministeryo ti iglesia, ken kangrunaanna, babaen iti parabur ti Apo. A kas paset ti bagi ni Cristo-Jesus nga isu ti Iglesia, ikagumaan tayo koma nga agbalin a kas ken Cristo, sipupuso nga agdaydayaw iti Dios tapno awaten ti sagot na nga ayat, nadalus ken nabileg a panagserbi ken addaan asi.

A kas nasantoan nga anak ti Dios, saan tayo nga agtalinaed iti napalabas a sursuro ti daan a tulag no di ket makipagmaymaysa tayo iti sursuro ti baro a tulag ken ti imun – una nga iglesia. Ti sursuro ken pakasaritaan ti Church of the Nazarene ket tawid manipud kadagiti naduma-duma a tattao ken panawen. Makipagmay – maysa tayo iti Arminian nga sursuro a ni Jesus ket natay para iti intero a sangalubongan (free grace) ket amin a tattao inikkan ti Dios iti kabaelan ken waya-waya nga agdesisyon tapno pilien na ti Dios ken ti pannakaisalakan (human freedom). Ti Church of the Nazarene ket bunga met ti Wesleyan Revival idi maika-sangapolo ket walo a siglo agingana ti tiempo ti “Holiness Movement” idi maika – sangapolo ket siyam aginga idi maika - baente a siglo.

Ti panaglabas dagiti siglo, ti pammati ken panagserbi dagiti maawagan nasantoan a tattao ken Cristo-Jesus ket nangayed. Daydayawen tayo ni Jesus! ay-ayaten tayo ni Jesus! panpanunuten tayo ni Jesus! Sarsaritaen tayo ni Jesus! ken pagbibiagan tayo ni Jesus. Daytoy ti kaipapanan ti kinasanto tayo ken ni Jesus. Daytoy ti kita ti kinasanto nga mangiladladawan kadatayo.

Adda Mision tayo

(We Are a Missional People)

Ti nakaibaonan tayo iti panagdaydayaw

Ti mision ti Iglesia iti sangalubongan ket mangrugi iti panagdaydayaw. Iti panag - tiptipon tayo nga agdaydayaw babaen ti panagkankanta, panagdengeg ken panagbasa ti Biblia, panangipaay ti daton ken apagkapullo, panagkararag, panagadal ken panangibingay ti Sao ti Dios, panagbautismo, ken pannakipaset iti komunyon ket banag nga maawatan tayo ti kaipapanan ti panaka – awag tayo a tattao ti Dios. Iti pammati tayo nga ti trabaho ni Apo Dios ditoy lubong ket maipatungpal babaen kadagiti managdaydayaw a kongregasyon ket ad – ada a matarusan tayo pay nga ti nakaibaonan tayo ket mangawat iti baro a miyembro ti Iglesia ken mangbangon pay ti baro a kongregasyon nga agdaydayaw iti Dios.

Ti panagdayaw isu ti kangatuan a wagas ken pamay-an nga mangiyebkas iti ayat tayo iti Dios. Ti panagdaydayaw tayo nakasentro ken ni Apo Dios nga nangisalakan kadatayo gapu iti parabur ken asina. Ti umuna unay nga gandat ti panagdaydayaw ket masarakan idiay lokal nga iglesia nga dagiti tattao ti Dios matiptipon da saan a para iti bukod da a kapadasan wenno pannakaitan – ok da no di ket babaen iti panangisuko ken panangipaay ti biag da iti Apo. Ti kaipapanan ti pudpudno a panagdaydayaw ket inton ti tao ket agbibiag iti ayat ken agserserbi iti Dios ken kadagiti dadduma a tattao.

Ti panagdayaw maibilang a gundaway ken responsibilidad dagiti annak ti Dios. Daytoy ket panagtiptipon dagiti namati iti presensiya ti Dios tapno agrambak ken iwaragawag kas sungbat tayo iti Kinaasiasinona, iti inaramid na ken iti kari na nga inna tungpalen.

Ti panagdaydayaw ti Iglesia lokal ket isu ti pakagupgupan a pakabigbigan tayo. Adda pannakaipatungpal ti misyon tayo gapu kadagiti lokal a kongregasyon gapu ta ti Church of the Nazarene ket pudno a managdaydayaw a kongregasyon. Ti kaipapanan, pammati, ken panagserbi ti Iglesia ket maipakita babaen iti panagdaydayaw. Ti panangiyadal iti Sao ti Dios, panangiyaramid kadagiti sakramento, ti grupo a panangbasa iti Nasantuan a Kasuratan, panagkanta kadagiti himno ken kadagiti barbaro a kankanta a panagdaydayaw, panagkakaddua nga agkararag, panangipaay kadagiti daton ken apagkapullo ket nalawag nga mangipakita ti ladawan ti panagdayaw dagiti Kristiyano. Paset met ti intayo panagdaydayaw ket isu ti panangisaknap ti panangisalakanna. Ti misyon ti panagdaydayaw ket isu ti mangpapigsa ti pundasyon ti Iglesia. Ta ngay ti Church of the Nazarene ket managdaydayaw nga iglesia lokal, ti nakaibaunan tayo ket agtultuloy iti panggep nga mangbangon pay ti baro a kongregasyon.

Ti Pannakipagrikna ken Panangiwaragawag ti Naimbag a Damag

A kas Kristiyano, umayon tayo nga adda ti nakaibaonan tayo ditoy lubong ket isu ti panangiwaragawg iti ayat ti Dios kadagiti pada tayo a tao, nangnangruna kadagiti saan pay a Kristiyano. Ti pannakipagrikna kadagiti agkasapulan ti tulong ken dagiti maw-awanan ti namnama ti biag ket paset met ti intayo nakaibaonan saan laeng kadagiti sumagmamano a Kristiano, no diket ti tunggal agbibiag nga addaan iti kinasanto. Ti Naindaklan nga nakaibaonan ken Naindaklan a Bilin ket mangisongsong kadatayo tapno makipagmaymaysa iti panangiwaragawag ti Naimbag a Damag, pannakipagrikna kadagiti sabsabali, ken kinalinteg. Babaen ti sipupuso a panangsumbat tayo ti Naindaklan nga ayab ken Naindaklan a Bilin ket itultuloy tayo met nga iyaw-awis kadagiti tattao tapno maaddaan da ti pammati, sungbat kadagiti kasapulanda, maaywanan, ken masalaknibanda manipud kinaawan ti hustisya, ken mainayonda iti Iglesia tayo.

Babaen iti panangtungpal tayo iti nakaibaunan tayo, iwarwaragawag tayo ti ayat ti Dios. Paset iti nakaibaonan tayo ket pagkappia iti sangalubongan iti Dios babaen kenni Cristo Jesus (2 Cor. 5:16-21). Iti iglesia ket instrumento iti Dios iti ministeryo iti ayat ken pannakappia babaen iti panangiwaragawag iti naimbag a damag, panakipagrikna, ken kinalinteg.

Ti Kangrunaan a Pakumit ken Kangrunaan a Bilin ti Panangiwaragawag ket isu ti panakasentro ti pannakatarus tayo ti misyon tayo. Adda ti dua a panangisao ti maymaysa a misyon, dua a pangsukatan ti maysa a mensahe ti ebanghelyo. Ni Jesus ti nangisuro kadatayo nga “Ayatem ti Apo a Diosmo iti amin a pusom, iti amin a kararuam, ken iti amin a panunutmo ken ayatem ti padam a tao a kas ti bagim” (Mateo 22:37, 39). Imbagana met kadatayo nga “Inkayo ngarud kadagiti amin a tattao ti amin a lugar, ket pagbalinenyo ida nga adalak: buniaganyo ida iti nagan ti Ama, ti Anak ken Espiritu Santo, ken isuroyo ida nga agtungpal kadagiti amin nga imbilinko kadakayo” (Mateo 28:19-20).

Ti nakaibaonan ti iglesia iti sangalubongan ket para iti amin a tao maigapu ta isuda naparsua a kalanglanga ti Dios ket adda ngarud pateg da. Ti nakaibaonan tayo ket ayaten ken ipateg ti amin a tattao a kas panagayat ken panangipateg ti Dios ket isu tarigagayan na nga maikkaan tayo ti talna, kinalinteg, ken pannkaisalakan manipud basol babaen ken ni Cristo-Jesus. Pagrebbengan tayo nga tulongan ken aywanan dagiti agkasapulan kadatayo. Pagrebbengan tayo a babalawen ti sistema iti panagkakadua ken linteg a mangiyaw-awan ti kinapateg dagiti tattao.

Ti nakaibaonan ti iglesia iti sangalubongan ket para iti amin a tattao. Pinarsua ti Dios ti entero a katatao tayo, ket ti misyon tayo nga agbalin a ministro ti ayat ti Dios iti bagi, kararua, ken espiritu dagiti tattao. Ti nakaibaonan tayo nga mangiwaragawg, makipagrikna, ken agbiag a nalinteg ket napagmaymaysa a misyon tapno masabet ti naipisikalan, karirikna, ken naespirituan a pagkasapulan.

Ti nakaibaonan ti iglesia ket para iti amin a tattao ta immay ni Cristo-Jesus ditoy lubong tapno isalakanna dagiti amin nga umawag iti naganna. A kas adipen ti Dios, gundaway ken pagrebbengan tayo nga ibingay ti Naimbag a Damag kadagiti mangayat a dumngeg. Mabalin a grupo a panagserbi ken bukod a pammaneknek. Ti panggep tayo ket gundawayan ti tungal kanito nga awisen dagiti tattao nga mamati ken ni Cristo-Jesus.

Ti misyon ti Iglesia ket para iti amin a tao ta ti Espiritu Santo ket naisagut para iti amin (Aramid 2). Ti misyon ti tunggal maysa ket iwaragawag ti Naimbag a Damag ti pannakaisalakan kadagiti amin a tattao babaen ken ni Cristo-Jesus. Naikkan tayo ti pannakabalin ti Espiritu Santo nga mapan iti sangalubongan tapno iwaragawag ti pagarian ti Dios ken makipaset iti Dios iti panangbangon ti ad-adu pay nga iglesia.

Mangnamnama nga adda ti naimbag nga bunga ti sagut ti Dios a misyon tayo. Daytoy ket nalablabes pay ngem panangiwaragawag tayo ti nataoan a panangalluad ken panaggaget. Ti nakaibaonan tayo ket panangsungbat iti awag ti Dios. Daytoy ti panakitinnulong tayo iti misyon ti Dios isu ti pannakikappia (Ministry of Reconcialtion). Daytoy ti pudno a pammaneknek ti iglesia nga mangiwaragawag iti ayat ti Dios ti sangalubungan, ti Naimbag a Damag, panakipagrikna, ken kinalinteg. Mamati tayo nga gapu iti parabur ti Dios, pinabarona ti sigud a nadadael nga panagbiag tayo gapu ti basol ken ituloy a parsuaen ken isubli kadagiti puso tayo ti ayat ti Dios.

Iti Nakaibaunan tayo a Mangiadal

Datayo ti adalan nga inkabil ti Dios tapno mangsanay kadagiti sabali pay nga agbalin nga adalan ni Jesus. Pampanunuten tayo nga nagbalin tayo nga adalan tapno sabten ti naespirituan a pagkasapulan ti tao babaen ti panagadal iti Biblia nga babaen met iti daytoy, dagiti namati ket mapapigsa ken rumang-ay ti pannakaammoda iti pammati ken ti relasyonda ti tunggal maysa ken iti Dios. Pagrebbengan tayo nga tarusan nga ti panagbalin nga adalan ket kanayon na ti naan-anay a panagpasakop ken panagsurot iti Dios ken panangbalanse kadagiti annuruten ti pammati. Mamati tayo nga rumbeng nga tulungan dagiti sabali pay tapno isuda met ket makapagbiag ti nasantoan, maaddaanda ti kalangen-langen a Kristiano ken agturay. Kinuna ni John Wesley nga “Datayo ket impaay ti Dios iti tunggal maysa tapno papigsaen dagiti pammatida.

Ti panagbalin nga adalan ket maysa a klase ti biag. Daytoy ket pamay-an ti Dios tapno masursuroan tayo no kasatno nga agbiag ditoy lubong. A kas sursuroen tayo nga agbiag a natulnog iti Sao ti Dios ken maaddaan ti pagrebbengan iti tungal maysa, daytoy met ti panakatarus tayo ti pudno a rag – o ti agpasakop kadagiti disiplina ti pammati, nakristianoan a waya-waya. Ti panagbalin nga adalan ket saan laeng nga naibatay iti bukod kinalaing, no diket panagpasakop kadagiti alagaden ken susuroten. Isu daytoy ti pamay –an ti Espiritu Santo a makatulong kadatayo tapno rumang-ay iti relasyon ken pammati tayo ken ni Cristo-Jesus. Ti panggep ti panagbalin nga adalan ket tapno adda naan-anay a panagbalbaliw nga umasping ken ni Jesus (2 Cor. 3:18).

Iti panagad-adal ken panangam-amires dagiti Kristiano iti Biblia, matakwatan da ti paggapuan ti pamparegta no mawaw kas agdaldalyasat iti kinaadalan. Maparparegta babaen iti panagagas ti Sao, malinlinisan babaen iti Sao, mapab-pabaro ti panunot babaen iti Sao ti Dios. Natakwatan dagiti adalan nga isuda ket “nabalbaliwan babaen iti panagbalbaliw ti panpanunotda”(Roma 12:2). Iti dalan dagiti Kristiano ket nakalukat a kas ti nangato ken silulukat a dalan. Datayo ket agtultuloy iti nasantuan a panagbiag. A kas adalan a maparparegta iti Sao ti Dios, ipapaay tayo ti biag tayo iti panagserbi iti Dios.

Pagtaktakderan tayo ti kinapateg ti naespirituan a sursuro ti panangsanay kadagiti lallaki ken babbai nga agbalin nga adalan ni Kristo. Ti sursuro iti panagkararag, panagayuno, panagdaydayaw, panagadal iti Sao ti Dios, panagserbi ken kinapakumbaba ket rumbeng nga isu ti panggep dagiti namati.

Ti panagbalin nga adalan kasapulan nga addaan iti pannakipagrikna ken panagayat. Iti bukbukod tayo, manmano laeng katayo ti rumangrang-ay iti naespirituan nga sursuro tapno pumimpintas pay ti relasyon ken panamati tayo. Patpatien tayo nga mapabpabileg ti naespirituan a panagbiag tayo babaen ti Eskwela Dominikal, panangisuro, panangaywan kadagiti sabali a tattao, panagadal iti Biblia, panagtitipon nga agkarkararag ken amin a trabaho nga kasapulan iti panagrang-ay ti naespirituan a panagbiag. Bigbigen tayo a paset ti kinaadalan tayo ti mangparang-ay iti kinasanto kadagitoy a panawen dagiti Kristiano.

Ti Nakaibaonan tayo Para iti Nangatngato a NaKristianoan nga Edukasyon

Ti edukasyon kadagiti Kristiano ket paset ti panangisagana kadagiti babbai ken lallaki para iti iglesia. Ti panggep tayo kadagiti seminaryo, kolehiyo ti pagadalan iti Biblia, ken universidad, ket tapno agtultuloy ti pannakaammo, panagrang-ay ti kauugali a nakristianoan, ken panangisagana kadagiti mangipangulo tapno tungpalen ti ayag ti Dios tapno agserbi iti iglesia ken iti sangalubongan.

Ti mas nangatngato a Nakristianoan nga edukasyon ket isu ti panakasentro a paset ti nakaibaonan ti Church of the Nazarene. Idi immun-una a tawtawen ti Church of the Nazarene, dagiti pagadalan para iti mas nangatngato nga edukasyon ket nabuangay gapu iti panggep nga isagana dagiti babbae ken lallaki ti Dios nga agbalin a panguloen dagiti nakristianoan a panagserbi tapno maiwaragawag ken maisubli ti pannakariing ti kinasanto a kas kinuna ni Wesley. Ti panagtultuloy a panangsuporta iti nangatngato a pannakaisuro dagiti Kristiano ket nagbunga iti pannakabuangay dagiti adu a seminaryo, Eskwelaan ti Biblia, kolehiyo, ken unibersidad iti intero a lubong.

Ti nakaibaonan tayo iti mas nangatngato nga edukasyon ket napabileg ken nagballigi nga instrumento tapno dagiti panguloen ti Church of the Nazarene ket mas epektibo kadagiti trabahoda iti iglesia. Gapu ti panagtultuloy tayo a panangsuksukimat iti Sao ti Dios lalo tayo pay nga ayaten ti Dios ti amin a puso, kararua, ken iti panunot. Iti kasta, maikari tayo nga agbalin nga naimbag nga taga-aywan iti panangpabaknang kadagiti panunot tayo, kadagiti adal tayo nga paggappuan iti kinalaeng ken usto a panangiyusar iti daytoy. Gapu iti daytoy nga rasrason, itultuloy ken sipupudno nga takwaten ti kinalaeng ken kinapudno nga kadwa iti sipupudno a pammati.

Ti nangatngato nga edukasyon patien na a ti pammati ket saan a nasinasina no diket napagkaykaysa a nasayaat iti pannakaamo nga ti pammati ken panagadal ket aggiddan a mapapintas iti biag ti Kristiano. Mapapintas ti tungal paset ti biag ti tao iti panunot ken panagbiag a kas naipataros iti pagayatan ken balabala ti Dios. Ti nakristianoan a kababalin ken ti panagisagsagana kadagiti Kristiano a pangulo nga agserbi iti iglesia ken iti sangalubongan ket babaen iti panagadal maipanggep iti Dios ken ti lubong. Ti nangatngato nga edukasyon, ti panakapasayaat ti tao ket agserbi a kas maysa a pagkasapulan tapno ti tunggal pangulo a Kristiano ket lalo nga epektibo kadagiti nadumaduma a trabaho ti Iglesia a kas iti panagmisyon, pangibingay iti ebangelio, panang-akem ti responsibilidad ti pastor ken pati metten iti pannakapapigsa ken panakailawlawag ti doktrina tayo kangrunaana iti mensahe ti kinasanto.

A kas tattao nga sinubbot ken naawagan nga kaas-asping ni Jesus ken imbaon ti Dios tapno mangipakita ti ayat ditoy lubong, makipagmaymaysa tayo iti trabaho ti Dios nga isu ti panakasubbot ti sangalubongan. Ti panggep pay ti edukasyon ket isu iti panangiyaramid ti tunggal Kristiano a pangulo nga agbalin nga napakumbaba iti panangitungpal kadagiti pagrebbengan ti iglesia ken ti intero a sangalubongan.

Inaldaw nga umil-ilet ken nakaro a nagulo ti lubong no adinno ket isu ti intay nakaayaban nga agserbi. Ti pudno a panagsaksi tayo iti kina Apo ni Cristo, ken ti nabileg a panakipagmaymaysa tayo iti Dios, buangayen na ti iglesia ket agtultuloy manipud iti tulong ti nangatngato a Nakristianoan nga Edukasyon.

Panagleppas

(Conclusion)

Naipasngay ti Church of the Nazarene idi isiserrek ti maika - duapolo a siglo! Kasta launay ti pannaka–convictar ni Phineas F. Bresee ken dagiti kakaduana a naaddaan ti panggep nga mangiwaragawag ti ebanghelyo ni Cristo-Jesus ken ti mensahe ti panagsanto kadagiti ig-iglesia ken sangalubongan. Saan a mailibak nga manipud iti pakasaritaan ti Iglesia Nazareno ken ti panagtultuloy ti panagrang-ayna ket mangpaneknek nga benbendisyonan ti Dios daytoy nga denominasyon ken ik-ikkan na iti umisu a pagturongan ti pammati ken ti nakaibaonanna. Nangrugi iti bassit a kongregasyon, ngem iti agdama, ti Iglesia Nazareno ket addaan iti miembro nga nasurok a maysa milyon ken uppat a gasut a ribo (1.4 million) ken addan iti sangagasut ken uppat a polo ket tallo (143) a ministeryo iti intero a lubong.

Ti iseserrek ti maika-dua polo ket maysa (21st) a siglo, ti birbiruken daytoy a denominasyon ket limaw–lawag pay. Addan dagiti pattapatta nga saan tayo a para iti maika- dua polo (20th) a siglo, no diket para iti maka-dua polo ket maysa (21st) a siglo. Nupay kasta, addatayo iti umisu a direksiyon tapno agaramid ti mas ad-adu ken mas napatpateg a maitulong tayo iti moderno a lubong. Daytoy nga pammaneknek ket naibatay iti tinawid tayo nga “Wesleyan-Holiness” a sursuro nga mangmangted ti makapasiddaaw nga agaramid ti parabur ti Dios. Mamati tayo nga ti gagangay a tao ken ti sociodad ket mabalbaliwan nga agnanayon babaen iti parabur.

Kanayon nga ibagbaga ni P.F. Bresee dagitoy a pagsasao, “Ni kaanuman ti init saan a lumnek iti agsapa”. Agsapa pay laeng iti Church of the Nazarene agingga ita ket ni kaanuman, ti init saan a lumnek iti denominasyon tayo iti intero a lubong. Adda inanama tayo nga mabalbaliwan ti lubong babaen ti panakaitultuloy ti pannakaikasaba ti mensahe ti panagsanto iti intero a lubong. Babaen ti nalawag nga sirmata, ti pannakibaklay, ken natibker a pammati, mamati tayo nga ti agdama a siglo ket kadakelan a gundaway a panangsursuro kadagiti tattao iti amin a nasion tapno agbalin da nga ad-adalan ni Cristo iti pammati ken panagbiag.